Migaga Mimatubula 28U PU1992. Migage Mimatubule28M. Miule. (Bilev 26.3-13; Mig 7.12-24)
1Pa duidedili diufi diFumu Nsambi enu ava duikelisili nokipanga migaga miotsu ami nyiduveyi namunyi, Fumu Nsambi enu oduvaga batu baneni va gari bisi malongu motsu. 2Guluanu miula miotsu ami dudila ava dudedilanga diufi diFumu Nsambi enu:
3Dugabulu miule o misiengi na dugabulu miula o musiru. 4Nesi baana benu nesi bivaru bienu nesi bangombi nesi bindombu nesi binsabi; bima bienu biotsu biugabulu miula. 5Ponsi tsienu na bidu bienu na miusu mienu biugabulu miula. 6Dugabulu miule ava duitolili na dugabulu miula ava duisoyimini.
7Fumu oduvega ndunga ava dutoyila na bavinitsi benu; jogu bopala nsila jimosi uyidutoyisa tumba bopansiga mu yisambuali yimansila udurina. 8Fumu odufunisila bisuegulu bienu na obuejisa bisalu bienu: odugabila miula o bulongu abu Fumu Nsambi enu oduvega.
9Va gusu Fumu duba tindi aba Nsambi nana amavanginina nenu, ava dukelisilanga maruma maFumu Nsambi enu nodedilanga duganu duandi. 10Batu botsu bolaba yiri dumakevega usalila Fumu Nsambi enu mbana boduduma. 11Fumu oduviosulila biotsu ava ofunisila nesi baana nesi migamba nesi biguji o bulongu abu Fumu amavangana na baiaji benu uduvega. 12Fumu odudibulila bungunu buandi buboti abuvu o julu nonoyisila bulongu buenu mfula va temu tsiwelimina nofunisa bisalu bienu biotsu. Gusombisa bisi malongu mapuela tumba jenu dugosomba. 13Fumu oduvayila yinama yigusu tsiri yinsima; dubanganga aberumi tsiri aberumu, ava dudedilanga maruma maFumu Nsambi enu ama nyiduveyi namunyi na ava dumakelisilanga nomakipanga, 14na duyasumuna nesi dimosi nesi disusu dimaruma motsu ama nyiduveyi namunyi ukota o muyitsa ubansambi bangana nobayitsanga.
Milogu
(Bilev 26.14-46)
15Tumba pa dugodedila diufi diFumu Nsambi enu na pa dugokelisa nokipanga maruma mandi motsu na migaga miandi miotsu abi nyiduveyi namunyi kabogu milogu miotsu ami dulogu amimi:
16Dulogu o misiengi na dulogu o musiru. 17Ponsi tsienu na bidu bienu na miusu biulogu. Bima bieni biotsu biulogu. 18Nesi baana nesi bivaru nesi bangombi nesi bindombu nesi binsabi. 19Dulogu ava dutolila na dulogu ava dusoyimina.
20Fumu odusingisa milogu na maguga na kindu na bisalu biotsu abi dusalanga te na dubungu nesi te na dugotamba nofu mu diambu dimbivulu tsienu atsimadurombisa ubusa Fumu. 21Fumu odunamusu yivunga te na yiudusielasana o bulongu abuba abuenu. 22Fumu odunamusu mivita na mabagu na masieyi na mbabisila na dungosu dunsala na yikuna na unengana na bivunga bieni biotsu biudunama te na dutsiemuga. 23Julu jiuba nderi kunga na butamba buba nderi budilu. 24Fumu odunoyisila mfula o bulongu bueni jidifufundu na fula; jiudunogulu te na dufu. 25Fumu osingisa bavinitsi benu udubokisa; duvioyila nsila jimosi uyebatoyisa tumba dupansiyila yisambuali yimansila ubarina; duba yisanunu yibisi butamba buotsu. 26Mfumbi tsienu tsiuligu na batsoli na bibulu; vagoba mutu ubabinga.
27Fumu odunamusa masieyi maEgypte na muvugu na yigasa na magoga abigorungula ubeluga. 28Fumu oduvaga malagu na bidunga na batumbalagu; 29nesi muangulu duyenabembatananga ava duiwendili nderi yidunga o tsi pisama. Bisalu bienu biotsu biugabuganga mansinsima. Dubusungu bilumbu biotsu na dukindungu na vagoba mutu uduwamusa.
30Dukuma bagetu na babaala basusu bofubana bitsiga nogu. Durunga mandagu na jenu beni dugomatsanina. Duvarisa manungi na dugodokula milunde. 31Bangombi benu boboku va misu menu na jenu beni dugobaji; baburu benu bogaangu va misu menu na bagodugabusila bonyi; bindombu bienu biuvegu ombu bavinitsi benu na vagoruga mutu uyiduwamusa. 32Baana benu bababaala na babagetu bokotusu o buviga; dubalabilila. Bilumbu biotsu duba na tindi nsala ogu tumba dugorungula ubalaba. 33Batu aba dusamalejaba bojanganga biguji bienu nesi bienu biotsu na yilumbu na yilumbu dukambusungu nadulasungu maguga. 34Dukaluga malagu ava dulabila puela mambu memama.
35Fumu odunamusu masieyi mu makotulu na mu mabelu amagorungula ubeluga, odunamusu monyi ubandila o tsi ditambi te no julu muru.
36Fumu odubege, jenu na kage enu aji dusola o bulongu abusakajabunu nesi nenu nesi na bataji benu. Aguna duyeyitse bansambi bangana bamuiri nesi bamamanyi. 37Mbura tsiotsu atsi Fumu odubega durangumunu kwaku na dudesungu na dupejungu.
38Dubeganga bivaru bipuela o manungi menu tumba dudilanga yika mua pesu digumba mu mbari makokoku modijanganga. 39Duvaranga mamfuga na dumatsonsiganga tumba dugonu malamu na dugodokula milunda mimonyi mu mbari batsiega bomaji. 40Dudila mioliva mu bulongu buenu buotsu; tumba dugogama matsi mu mbari mioliva miugoluga. 41Duburanga baana bababaala na babagetu tumba bagoba abenu mu mbari bobegu baviga. 42Bibungi biubunga miri mienu miotsu na milunda mienu miotsu.
43Benyi abotsananga nenu bodurumanga na jenu duba tindi basalitsi bogu. 44Jogu bodusomba tumba bagodusombisa. Jogu boba va gusu, jenu duba va nsima.
45Maguga mamilogu mieni miotsu modubemba na modudukanga te na dufu mu mbari dusamadedila diufi diFumu Nsambi enu na dusamadedila maruma mandi na migaga miandi abi amaduvega. 46Maguga memama modugolulu jenu na bategula benu te na mutubu.
47Dusamasalila Fumu Nsambi enu na nsangu na mirima misunda ava dumabila na tindi digumba dibima biotsu, 48kabogu Fumu odusingisa usalila bavinitsi benu na nsala nesi puila nesi penyi nesi digambu dibima biotsu. Bodunangusa yilala yibudilu te na bodubokisa. 49Fumu oruma bisi bulongu aborambuyila tindi vala uyitoga nenu; borambuyila tindi o masuka mabulongu, bodusutisa nana mbira esutisili. 50Bavu batu aba dugogulusunu, bavu na bukanyi abagoyitsa nesi yinunu na bagolasa baana yingeba. 51Bojanganga mivogulu mienu mibangombi na digumba dienu te na jenu botsu duboku; bagodusila nesi tsangu tsible nesi malamu mamienga nesi matsi nesi bangombi nesi bindombu nesi binsabi: jenu botsu dutsiemuga. 52Bodukanda o misiengi mienu miotsu te na bivaga bienu biuberuga nesi bisakama na biwara abi dumavayilanga yitu yiari na yiari; bodukanda yiari na yiari o bulongu abu Fumu Nsambi enu oduvega. 53Va temu aji bavinitsi benu bodutsoyisanga dujanganga musonyi ubaana benu bababaala na babagetu aba Fumu Nsambi enu amaduvega. 54Dibaala adimaleba na tindi yingeba na murima udeda ovina muana taji andi nesi mugatsi andi nesi baana bandi; 55agogabila ne umosi musonyi ubaana bandi agu ojanganga; agoba na biguji bisusu, temu eni jiuba jimaguga na jimunyongu; bavinitsi benu bodutsoyisanga o misiengi mienu. 56Mugetu aguvu na tindi yingeba nesi murima udeda nesi yisagumunu ovina mulumi andi nesi muana andi udibaala nesi umugetu; 57agogabila kueba andi nesi muana agu abanobura abi ojanganga o musuega; va temu eni aji bavinitsi benu bodutsoyisanga.
58Kelisanganu na kipanganu mambu motsu mamigaga amimasonugu mu dibuku diedidi; dumanu Fumu Nsambi enu aguvu na diina diduyitsu na diduma. 59Pa dugovaga motsu mana Fumu odudimbisa jenu na bategula benu na odunamusu mapura maranga nodubokisanga na maali maranga na mayibenda. 60Odubeyila bivunga biotsu biEgypte, bionyi biudulasa goma te na duregama; na biudunama. 61Munongu mosi Fumu odutindila minongu na minongu mimaali na mapura amasamarangunu mu dibuku dimigaga te na dubungu. 62Diuleba dumafunanga ne uviolila bambuelili dusiala yika mua dutalu dugeyi mu mbari dusamadedila diufi diFumu Nsambi enu. 63Diuleba Fumu amalaba ubueji uduvayilanga maboti nodufunisanga, jabanu dedi mosi olaba ubueji nodubokisa nodubunga; dugomuekota o bulongu bueni abu mbe dudila. 64Fumu odupansa yiari na yiari o malongu motsu te na masuka mabutamba. Aguna duyitsilanga bansambi bangana aba jenu na bataji benu dusamalejaba, diwendi rie: bakosi bamiri na bamamanyi. 65Dugoba sui o malongu meni na dugoba na mbura jiuvumina. Fumu obukisa mirima mienu na misu menu moba timbila na otsirisa mirima mienu. 66Duba na mirima o julu mu nsanunu tsienu tsiotsu; nyangu na mukolu dubanganga na goma na dugoba na mirima misunda. 67Mu diambu digoma ajiubasa mirima mienu na motsu ama dulaba, kedi duvosa rie: Aa mbe tuvu tsisiga! Ava tsisiga duvosa rie: Aa mbe tuvu kedi! 68Fumu odugabusa o Egypte mu makumbi mamamba oduviosila mu nsila aji nyimadutsingula rie: Dugomuejilaba. Aguna dubila na nsala ukesumbisa baviga ombu bavinitsi benu nesi bagetu nesi babaala; tumba vagoba mutu udusumba.
Malongi mosita maMoise
69Guluanu nana Moise amarumunu na Fumu uwarisa pangini andi na baIsrael o bulongu buMoab. (Pangini ejiji jigaa jimosi na ajimavangunu o mukongu uHoreb.)
Currently Selected
Migaga Mimatubula 28: PUU1992
La sainte Bible en langue Yipunu © Alliance Biblique du Cameroun, 1992.
