DJENU ILOMBI DU BUSE? TSIA UKELE DWI KELI?

Manombe boti mwane mughétu nane dwi ba labili ô bapunu. Ike mangu mangu. Nè tsoli be néngili ivuandi u vioghange. Amabe a wélu na dibale bé néngili Bitoli. Tinde dibale di mambangu.
Bitoli akale be dibale di mambangu amabe na mwa yufu : dikake. Nave nave kube. Dike roghe dike gheyi kube.
Manombe a ma kalughe ndungu Bitoli, magnuru ike mbake. Mavanene ma kube a tsi bilumbu biotsu. A tsi dimbusu kube nyangu mba mukolu a mu ghébule va tangi. Iké busi kube !
Ike dikambi !!
Manombe a ma soghe mulumi diele. Ake vagha mwa bu kôoli.
Manombe akane isuéghulu mu ghabuse tsombu Bitoli, a gho tsi fwile mu diambu di “Mubutu”.
Madile ma ma dughu, Manombe ama négile bandi.
Ilumbu, Bitoli a la lombi lombi, kane djike viva na batu : babodji.
Bitoli ama ba ve bitsighe, mambe na mwa mbari. Ama néngile Manombe ake lambe bighudji.
Manombe yi naniangu ngo lambe ma ma tsinge. Ni ma toghe, ni ma vurulu !
Ni rondi uvose mwa diambu nawu va misu ma bami.
Yari a yéyi biburu bi Manombe, a yine Bitoli ake vike ka ba ma mu sutusu.
Va ghari Manombe i dughulu du labe : mè diwele nga boke. Pa du tsi buse nu ké swékighe, Manombe djandu wune a ma bande u lile.
Katsi Manombe makake va djullu muru, bighari u siéngughe : « Ma ! tsiè nga vale na tsombu ngane ?
Manombe a ma nyangule mwa disite mu tsande : « La tsombu a djidji, mu véghianu dike suke.
Ni ma yirughe mulombu Bitoli. A tsi ndimbe mba nga mwé mu vegha bighudji, na bi tandu na bi bande. Nesiooooooooooooooooo ni ma buse. »
Bake lende Manombe. Mughetu na kabu !! Manombe i kosu kosu ni ma buse.
Katsi a ma bo tsombu a ma wakise Bitoli. Diwele a votsu mè mwane katsiami o wè nami.
Ba ma nangule mifune ike mukongu bé mati, Bitoli ike ivolu.
Sunge Bitoli bakua : « Manombe isongu i ngudjawu »
Manombe : « Ngudjami i siengi ? »
Bitoli : « u dodise ni dodisi isongu i ngudjawu »
Manombe : « Siengango tumbe me ni ma wendooo. »
Bitoli dibale di mambangu ama tase mwa ighume : « Hé Manombé wendangué ni tsi le u vaghé !! Manombe ! nè bipele isusi di dji wune ! ave uke kile di bindeme !! uke fule pinde ô mumbu ni di banighe. Nguendze Manombe wune i wendi u mwé dile dimosi nane didia ? »
Manombe kabo a ma tase nane ama sighila tsambi tsi mabelu na mulumiandi.
Suke kondu rodwa : « Ah mbuku mama ! ngo mwe wenda ! bonga tsombu nga siale na Bitoli »
Biburu ba ma kambe Manombe mu bare mukonu u sindile ike na mirumbe.
Biburu wa magnuru ma ma vole. Bake bo tsombu, Manombe a ke siale na mulumiandi Bitoli.
Motsu mane mu dodise nongu ivunde i mupunu a ma tu sile : Mughanfi budji ô munu mbatsi baghé ghobuli.
Diambu di Manombe a didine, diome nénu ?
Source: Cyr thierry koumba